Բարի եկած էք
Զարմանազան 2026

«Զարմանազան» ծրագիրը հիմնուած է 2016-ին՝ Գալուստ Կիւլպէնկեան Հիմնարկութեան (Փորթուկալ) կողմէ, որպէս արեւմտահայերէնի վերաշխուժացման նախաձեռնութիւն մը։ Առաջին հաւաքը տեղի ունեցաւ 2017-ի ամրան Ֆրանսայի մէջ՝ «Հազար ու մէկ աշխարհ» ընկերակցութեան եւ «ԻՆԱԼՔՕ» համալսարանին հետ համագործակցութեամբ։ Այդ թուականէն ի վեր, «Զարմանազան»ը ամէն տարի կը հրամցնէ ստեղծագործութեամբ, փոխանակումներով եւ բացայայտումներով լեցուն չորս շաբաթ՝ լեզուական ամբողջական իւրացումի միջավայրի մը մէջ։

Նոյնիսկ 2020-ի եւ 2021-ի ամառները, երբ համաճարակը արգիլեց ֆիզիքական հաւաքները, ծրագիրը չդադրեցաւ։ «Զարմանազան»ը վերածուեցաւ «Զարցանց»ի եւ ինքնատիպ հարթակի մը միջոցով միջազգային առօրեայ հանդիպումներու համար մշակուեցան բազմաթիւ առցանց աշխատանոցներ եւ հանդիպումներ, ուր տաքուկ մթնոլորտ մը ստեղծուեցաւ խաղերով, բացայայտումներով եւ ստեղծագործութիւններով։

Անցած 9 տարիներուն ընթացքին շուրջ 1000 հոգի քով քովի եկած են։ Առաջին տարիէն սկսեալ 10-էն 17 տարեկան պատանիներ, 2018-էն ի վեր 18-էն 24 տարեկան երիտասարդներ, վերապատրաստութեան նպատակով մօտաւորապէս 90 ուսուցիչներ, ինչպէս նաեւ՝ մանկավարժական, վարչական եւ կազմակերպչական անդամներ…։ Իւրաքանչիւր տարին առիթ ստեղծած է նոր կապեր հաստատելու եւ արեւմտահայերէնով միասնաբար յառաջանալու փափաքը ներշնչելու՝ յատկապէս տարուան ընթացքին կազմակերպուած առցանց հանդիպումներու ալ շնորհիւ։ 2026-ը պիտի ըլլայ «Զարմանազան»ի 10-րդ տարին՝ կրկին մէկտեղելով երեխաները, պատանիները, երիտասարդները, վերապատրաստուող ուսուցիչները եւ մանկավարժական կազմը։